நீங்கள் தேடியது "பசுமை பட்டாசு"

சிவகாசி:

இந்தியாவின் 80 சதவீத பட்டாசு தேவையை சிவகாசி பட்டாசு ஆலைகள் பூர்த்தி செய்து வருகிறது. பட்டாசு உற்பத்தி மையமாக விளங்கும் இங்கு 800-க்கும் மேற்பட்ட பட்டாசு ஆலைகள், தீப்பெட்டி ஆலைகள் இயங்கி வருகின்றன.

இதன்மூலம் நேரடியாகவும், மறைமுகமாகவும் 8 லட்சம் தொழிலாளர்கள் வேலை வாய்ப்பு பெற்று வருகின்றனர்.

கடந்த சில ஆண்டுகளாக சுற்றுச்சூழல் மாசு அடைவதாக கூறி பட்டாசு உற்பத்திக்கு தொடர்ந்து கடுமையான தட்டுப்பாடுகள் விதிக்கப்பட்டு வருகின்றன. இந்த ஆண்டு தீபாவளி பண்டிகையன்று குறிப்பிட்ட நேரத்தில் தான் பட்டாசு வெடிக்க வேண்டும் என உச்சநீதிமன்றம் உத்தரவிட்டது.

இதன் காரணமாக பட்டாசு விற்பனை பெருமளவில் சரிந்தது. மேலும் பசுமை பட்டாசுகளை தயாரிக்க வேண்டும் எனவும் நீதிமன்றம் உத்தரவிட்டது. இதனால் பட்டாசு தொழிலை நடத்துவதில் சிக்கல் ஏற்பட்டது.

உச்சநீதிமன்றம் விதித்துள்ள கட்டுப்பாடுகளை தளர்த்த வேண்டும், பட்டாசு தொழிலாளர்களின் வாழ்வாதாரத்தை பாதுகாக்க வேண்டும் என வலியுறுத்தி சிவகாசியில் கடந்த ஒரு மாதமாக பட்டாசு ஆலைகள் வேலை நிறுத்த போராட்டத்தில் ஈடுபட்டு வருகின்றன.
இதன்காரணமாக லட்சக்கணக்கான தொழிலாளர்கள் வேலை இழந்துள்ளனர். வேலை நிறுத்தத்தை முடிவுக்கு கொண்டு வர அரசு சார்பில் பேச்சுவார்த்தை நடந்தது. அதுவும் தோல்வியில் தான் முடிந்தது.

பட்டாசு ஆலைகளை திறக்க நடவடிக்கை எடுக்க வேண்டும் என வலியுறுத்தி சிவகாசியில் பட்டாசு உற்பத்தியாளர்கள் சங்கம், தொழிலாளர்கள் சங்கம், அச்சக உரிமையாளர்கள் சங்கம், சிறுவணிகர்கள் சங்கம் என அனைத்து தரப்பினரும் இன்று (21-ந்தேதி) கடையடைப்பு போராட்டத்தில் ஈடுபடப் போவதாக அறிவித்து இருந்தனர்.

அதன்படி இன்று சிவகாசி மற்றும் திருத்தங்கல், வெம்பக்கோட்டை, தாயில் பட்டி மற்றும் சுற்று வட்டார பகுதிகளில் முழு கடையடைப்பு போராட்டம் நடைபெற்றது. சிவகாசியின் முக்கிய வீதிகள் வெறிச்சோடியது.

மார்க்கெட், பஸ் நிலையம் மற்றும் முக்கிய இடங்களில் மக்கள் கூட்டம் குறைவாகவே காணப்பட்டது. இந்த போராட்டம் காரணமாக 5 ஆயிரத்துக்கும் மேற்பட்ட பெரிய மற்றும் சிறிய கடைகள் அடைக்கப்பட்டு இருந்தன.

கடையடைப்பு போராட்டம் காரணமாக சிவகாசி, திருத்தங்கல், வெம்பக்கோட்டை உள்ளிட்ட பகுதிகளில் பொதுமக்களின் இயல்பு வாழ்க்கை பாதிக்கப்பட்டது. #FireCrackers

புதுடெல்லி:

தீபாவளியின்போது இரவு 8 மணி முதல் 10 மணி வரை பட்டாசு வெடிக்கலாம் என்று சமீபத்தில் அறிவுறுத்திய சுப்ரீம் கோர்ட், அதிகப்படியான சத்தம் மற்றும் காற்று மாசு ஏற்படுத்தும் பட்டாசுகளின் தயாரிப்பு மற்றும் விற்பனைக்கு தடை விதித்துள்ளது.

குறைவாக மாசுபடுத்தும் மேம்படுத்தப்பட்ட நவீன வகை பட்டாசுகளை (பசுமை பட்டாசு) மட்டுமே இனிமேல் தயாரிக்க வேண்டும், விற்பனை செய்ய வேண்டும்.

குறிப்பாக, காற்றுமாசு அதிகமுள்ள டெல்லி பகுதியில் தடை செய்யப்பட்ட பட்டாசுகளை விற்பனை செய்யாமல் பார்த்துக்கொள்ளவேண்டும். தீர்ப்பில் கூறப்பட்டுள்ள விதிமுறைகள் மீறப்பட்டால், அந்த இடத்தின் காவல் நிலைய அதிகாரி பொறுப்பாக்கப்படுவார், பிறகு அவர்மீது அவமதிப்பு வழக்கு தொடரப்படும் என்று நீதிபதி ஏ.கே சிக்ரி மற்றும் நீதிபதி அஷோக் பூஷண் அடங்கிய சுப்ரீம் கோர்ட் அமர்வு தீர்ப்பளித்தது.

இதனால் பாதிக்கப்பட்ட டெல்லி பட்டாசு விற்பனையாளர்கள் பெரும் இழப்பை சந்தித்துள்ளனர். பசுமை பட்டாசு என்ற ஒன்று தயாரிக்கப்படாத நிலையில், அதை எங்கிருந்து கொள்முதல் செய்து மக்களிடம் விற்பனை செய்வது என அவர்கள் ஆத்திரத்துடனும், வேதனையுடனும் கேள்வி எழுப்புகின்றனர்.


இப்படிப்பட்ட உத்தரவுகளை பிறப்பிப்பதற்கு ஓராண்டு முன்னதாகவே பசுமை பட்டாசுகளை தயாரித்து இருப்பில் வைத்திருக்க வேண்டுமல்லவா? எனவும் அவர்கள் ஆவேசமாக கேள்வி எழுப்பினர். #firecrackers #greenvegetables #greenvegetablesfirecrackers #newinnovation #greencrackers 

காரைக்குடி:

காரைக்குடி மத்திய மின் வேதியியல் ஆய்வகத்தில் (சிக்ரி) 2 நாட்கள் பார்வையாளர் தின விழா நடைபெற்றது. இதையொட்டி காலை 9.30மணி முதல் மாலை 4.30மணி வரை பார்வையாளர்கள் பார்வையிட அனுமதிக்கப்பட்டனர். இந்த ஆய்வகத்தில் மின் வேதியியல் துறைக்கு பயன்படும் நவீன கனிம மற்றும் மூலப்பொருட்கள், மின் கரிம வேதியியல், மின் கனிம வேதியியல், நோய் சம்பந்தமான கிருமிகளை ஆராய பயன்படும் நவீன சென்சார்கள் மற்றும் மின் முலாம் பூசுதல் ஆகிய பல்வேறு துறைகளில் ஆராய்ச்சி மூலம் 250-க்கும் மேற்பட்ட தொழில் நுட்பங்கள் உருவாக்கப்பட்டு உள்ளன. மேலும் நைட் ரேட்டை அடிப்படையாக கொண்டு சிவகாசியில் பட்டாசு தயாரிக்கப்படுகிறது.

மேலும் நாட்டின் மொத்த தேவையில் 85 சதவீதம் பட்டாசுகள் சிவகாசியில் தயாரிக்கப்படுகிறது. அதிக ஒலி மற்றும் காற்று மாசு ஏற்படுவதால் புதுடெல்லியில் இந்த பட்டாசை விற்பதற்கு தடை உத்தரவு பிறப்பிக்கப்பட்டுஉள்ளதால் பசுமை பட்டாசு தயாரிக்க வேண்டிய கட்டாயத்தில் பட்டாசு உற்பத்தியாளர்கள் உள்ளனர்.

பொதுவாக சிவகாசியில் தயாரிக்கப்படும் பட்டாசுகள் அலுமினியத்தை மூலப்பொருட்களாக வைத்து சல்பர், கார்பன், பொட்டாசியம் நைட் ரேட் ஆகியவை சேர்த்து தயாரிக்கப்படுகிறது. தற்போது இங்கு கண்டு பிடிக்கப்பட்டுள்ள இந்த பட்டாசில் அலுமினியத்திற்கு பதிலாக மெக்னீசியம் சேர்க்கப்பட்டுஉள்ளது. சல்பர் மற்றும் கார்பன் தேவையில்லை. இந்த பட்டாசின் ஒலி அளவு 120-ல் இருந்து 111 டெசிபலாக குறையும். மேலும் காற்று மாசு 70சதவீதமாக குறையும். வரும் தீபாவளி பண்டிகையின் போது இங்கு தயாரிக்கப்படும் இந்த பசுமை பட்டாசுகள் சந்தைக்கு வர வாய்ப்பு உள்ளது.

இதில் சிக்ரியுடன் நாக்பூரில் உள்ள நீரி ஆராய்ச்சி நிலையம், சிவகாசி டான் பாமா ஆகியவை இணைந்து செயல்படுகிறது. சிக்ரியில் 2 நாட்கள் நடைபெற்ற பார்வையாளர் தின விழாவில் நடைபெற்ற ஆராய்ச்சிகளை தமிழகம் முழுவதும் உள்ள பள்ளி மற்றும் கல்லூரிகளில் இருந்து 22 ஆயிரத்திற்கும் மேற்பட்ட மாணவ-மாணவிகள், பொதுமக்கள் பார்வையிட்டு அதற்கான விளக்கங்களை கேட்டு தெரிந்துகொண்டனர்.

மேலும் ஆய்வகத்தில் தொழில் நுட்ப ஆராய்ச்சிகளின் புதிய கண்டுபிடிப்புகள் மற்றும் அவற்றின் மாதிரிகளின் செயல் விளக்க வண்ணப்படங்கள் ஆகியவைகள் பார்வையாளர்களின் கண்காட்சிக்கு வைக்கப்பட்டு இருந்தது. அவற்றை மாணவ-மாணவிகள், பொதுமக்கள் பார்வையிட்டனர். இதற்கான ஏற்பாடுகளை மத்திய மின்வேதியியல் ஆய்வக இயக்குனர் டாக்டர் விஜயமோகனன் பிள்ளை தலைமையில் விஞ்ஞானிகள் செய்திருந்தனர்.